Marttein rockaren eta musika elektronikoaren arteko fusioa egiten duen abeslari eta ekoizle argentinarra da. 2016an hasi zuen ibilbidea, hamabost urte zituela, Buenos Airesko underground rave eta kluben eszenan. Hainbat EP eta bere albumen trilogia —Antro (2017), Guerra (2018) eta Némesis (2019), SoundClouden eskuragarri— argitaratu ondoren, jauzi handia eman zuen 2024aren amaieran argitaratutako bere izen bereko albumarekin.
Bederatzi abestiz osatutako lan honetan, zazpi urtez underground klubetan jotzen eta ia oihartzunik izan ez zuten albumak argitaratzen aritu ostean sentitzen zuen frustrazioa eta porrot-sentsazioa jaso zituen. Proiektuak Una película argentina filmean aurkitu zuen bere adierazpen bisuala. Filmean “el rubio” da protagonista, bere buruari, bere bizitzari eta ametsaren bila gaueko giroan izandako bizipenei buruzko satira. Albumak Dillom, Juana Rozas eta Mariana Enriquezen kolaborazioak izan zituen, eta El Maquinal eta Niceto Club aretoetako kontzertuetarako sarrerak agortu zituen. 2025ean zehar, Martteinek Argentinan eta Latinoamerikan zehar bira egin zuen, Mexikon, Kolonbian eta Uruguain ere arituz. Urte berean, El Marrón eta Morir al Sol argitaratu zituen, rockabillyaren eraginak dituen single bikoitza, eta ondoren Espectacular, egungo indibidualismoa eta gazteen arrakasta-obsesioa irudikatzen dituen EPa. Proiektuak film labur bat ere izan zuen, Tomás Rebord interludio batean eta Six Sex Pizza Party-n kolaboratzaile zituela.
Argitalpen horiek La Trilogía de la Decadencia osatzen dute, Teatro Vorterix jendez lepo zegoela aurkeztu zena. Billy Idolen kontzertuaren aurretik ere aritu zen Movistar Arenan, eta 2026ari Lollapaloozan egindako emanaldi batekin eman zion hasiera.
