María José Llergo (Pozoblanco, 1994) Espainiako kantu flamenkoaren promesa gaztea baino askoz gehiago da. Artista sendoa da, berezkoa duena entzuleak hunkitzeko eta emozioak sorrarazteko gaitasuna, bere konpromiso artistikoari uko egin gabe. Tradizioa eta abangoardia modu naturalean uztartzen ditu, flamenkoaren adierazpide unibertsala publiko mota guztiengana hurbilduz. Bere musika etengabe berritzen eta bilakatzen da, lurralde sonoro berriak esploratzeko eta erronka berriei heltzeko duen abentura-izpirituaren isla.
Diziplina anitzeko artista da: abestu, konposatu eta hainbat instrumentu jotzen ditu. 2018an hasi zuen ibilbidea, «Niña de las dunas» abestiarekin, eta ordutik etengabe hazi da. Dua Lipa eta Jorja Smith bezalako artistek parte hartu duten COLORS ikus-entzunezko plataforman agertzeak bere musika mundu osora zabaltzen lagundu zuen. Ondoren, «Sanación» EPa argitaratu zuen, flamenkoa giro-elektronikako testurekin uztartzeko duen ikuspegi pertsonal eta berritzailea erakutsiz, betiere bere jatorriari omenaldia eginez.
«Ultrabelleza» azken diskoan, gainditzea eta borroka dira begirada distiratsu eta alai batetik igortzen diren emozioen oinarriak. Ahalduntzeak bultzatutako bizitzaren berpizkundea da, heldutasun artistiko eta pertsonaleko prozesu baten emaitza, naturala bezain miresgarria. Pozoblancoko artistak beldurrik gabe esperimentatzen du eta ohiko kodeak berritzen ditu. Forman zein edukian mugak gainditzen dituen disko honek askotariko eraginak biltzen ditu, maitasuna eta enpatia aurrera egiteko eta garatzeko funtsezko tresna diren soinu-unibertso sofistikatu batean. Ildo horretan, diskoak artistak irudikatzen duen mundu idealaren isla eskaintzen du: berdintasunezkoagoa eta bidezkoagoa den mundua. Aldi berean, babesleku eta gune seguru bihurtzen da gizarte-arau tradizionaletan bere tokia aurkitzen ez duen edonorentzat.
