Musgö

Musgö pop, folk eta musika elektronikoaren eraginak dituen kadiztar harpa-jotzaile eta abeslaria da, estilo berezi eta benetakoa landu duena. Eszenatokietan hamar urte baino gehiagoko esperientziarekin, bere abestien letren eta musikaren egilea da, baita bere bideoklipen sortzailea ere. Musgören zuzenekoak bidaia hipnotiko bat dira, elektronikoa eta akustikoa uztartzen dituztenak, harpa —bere lagunik kuttunena— eta bere ahots berezia protagonista nagusi bihurtuz.
2019an bere lehen diskoa argitaratu zuen, Open the Gate, eta 2021ean RTVEren Playz kanalerako Grasa telesailaren soinu-banda konposatu zuen. 2023an argitaratu zuen bere lehen diskoa gaztelaniaz, Un sendero. Urte horretan bertan, diskoa Mondosonoro-rentzat World Music-eko hamar disko onenetako bat bezala aukeratua izan zen, eta Tulipanes rojos abestia Espainiako abesti onenen artean nabarmendu zuten. Udazken hasieran Musgök bere lan berria aurkeztuko du, La grieta, eta dagoeneko ezagutzen ditugu lehen bi singleak: Veneradas y temidas eta Perdiendo el brío.