Carbonell Zuzenbidean lizentziaduna da Madrilgo Unibertsitate Konplutentsean.
2007az geroztik, Estatuko Ekonomialarien Goi Mailako Kidegoko funtzionarioa da, eta Espainiako Administrazio Publikoan hainbat kargu bete ditu bere ibilbide profesionalean, batez ere ekonomia- eta merkataritza-arloetan.
2020tik 2021era, Nazioarteko Gaietarako aholkularia izan zen Espainiako Gobernuko presidenteordearen eta Ekonomia Gaietako eta Eraldaketa Digitaleko ministroaren kabinetean. Aurretik, 2012tik 2015era, Europar Batasuneko Gaien arduraduna izan zen Ekonomia eta Lehiakortasuneko ministroaren kabinetean, eta Legeria eta Finantza Politikako zuzendariorde nagusia Ogasunaren Idazkaritza Nagusian.
Atzerrian, 2015etik 2020ra, Espainiak Kolonbian duen Enbaxadako Ekonomia eta Merkataritza Aholkularitzako buru izan zen.
Horrez gain, prestakuntza osagarria jaso du gai publikoen kudeaketako joera berriei buruz Oxfordeko Unibertsitatean, teknologiari eta ekintzailetzari buruz MITen, eta talde-lidergoari buruz ESADEn.
Gaur egun, ICEX Espainiako Esportazio eta Inbertsioen zuzendari nagusia da. Enpresa-erakunde publiko horren eginkizuna Espainiako enpresen nazioartekotzea sustatzea eta Espainian atzerriko zuzeneko inbertsioa bultzatzea da.
ICEX Industria, Merkataritza eta Turismo Ministerioko Merkataritza Estatu Idazkaritzaren barruan dago. Merkatuen eta merkatuetarako sarbide-baldintzen analisia eskaintzen du, baita erakunde-harremanetarako eta interesen ordezkaritzarako aholkularitza ere. Halaber, negozio-aukerari buruzko informazioa, laguntza juridikoa eta finantzarioa, esportaziorako prestakuntzaren ebaluazioa eta nazioartekotze-estrategiak diseinatzeko eta ezartzeko prestakuntza eskaintzen ditu. Espainiarako kapital-fluxuak sustatzeko, nazioarteko inbertitzaileentzako zerbitzu ugari ere eskaintzen ditu.
ICEXek Espainian dituen 31 probintzia- eta lurralde-zuzendaritzen eta mundu osoan banatutako 104 ekonomia- eta merkataritza-bulegoren sarearen bidez eskaintzen ditu zerbitzuak.
